SERKAWN TUALCHHUNG KOHHRAN

CHANCHIN THA MI TIN TAN

PROGRAMME






PATHIANNI ZING INKHAWM PROGRAMME:

10:00 AM, 11th JULY 2021

PROGRAMME:




KOHHRAN MEMBERTE HNENA HRIATTIRNA : 11th JULY 2021

Inkhawm Hruaitu: Tawngtaina



Pathian fakna hla:-KHB No 591 ‘Amahchu malsawmna hnar a ni’

Kan sak chhung hian Pathian hnena kan thilpek lakkhawm ni se.

Amah chu malsawmna hnar a ni,
Ka dam lai kawng chhuk chhovah hian;
Ka mamawh tinreng mai min petu,
Lalpa chu eng nge ka pek ve ang?

A thilpek sawi hleih theih loh vang hian,
Lalpa chu eng nge ka pek ve ang?
A fapa pawh ui lova min petu,
Lalpa chu eng nge ka pek ve ang?

A hnenah ka nun ka hlan ang a,
A hman atan ka inpe ang;
Ka neih eng pawh chan dawn mah ila,
Lawm chungin a rawng ka bawl fan ang.

Lawma hlim zai lo thei ka ni lo,
Ui lova a Fa min petu'n;
Ka tlakchham apiang min neihtir a,
Lawma hlim zai lo thei ka ni lo.

TAWNGTAI RUALNA

    Tawngtaina a hriat turte
  1. Vawiin thlenga Pathian malsawmna leh venhimna kan chan avangin lawmthu i sawi ang u. Chhandamna Chanchintha changtu kan nih avangin lawmthu a tharin i sawi ila, Chanchintha puan darhna kawnga kan tih tur tha tak leh thahnemngai taka kan thawh theih nan Pathian tanpuina i dil ang u.
  2. A huhovin Pathian chibai bukna leh fellowship te nei thei rih lo mah ila mimal leh chhungkuain Pathian pawlna leh chibai bukna tha tak nei chhunzawm zel turin inhlan ila, Thlarau malsawmna i dil ang u
  3. Covid19 thawh hnihna lo thleng mek laka kan him theih nan leh a dona kawnga thawktu ram hruaitute leh task force te tan tawngtai sak ila.
  4. Covid 19 avanga enkawl lai mek, Covid19 vei enkawltu zawng zawngte leh a bik takin ZMC a thawk tute tan.
  5. Kan veng VLTF te tan, Pathian venhimna leh awmpuina an chan theih nan.
  6. Covid 19 avanga tuar te leh lusun zawng zawngte tan. Pathian thlamuanna an chan zel theih nan.
  7. Kan khawtlanga khawhar chhungte tan.
  8. Kan Biak in sak mek kan theih ang angin kan chhunzawm ve zel a, a hmalatuten Pathian atanga finna nena thiam taka an enkawl zel theih nan.
  9. Kan thawhlawm, inkhawmna leh keimahni Pathian hnenah I hlan ang u.

Sam 119 : 71-72

I thuruattechu ka zir theih nana Tihhrehawma ka lo awm kha ka tan a tha a ni. Rangkachak leh tangka sang tam tak ai chuan I kaa dan chhuak chu ka tan a tha zawk e.

Sam 119 : 91-92


Chungte chu vawiin hian I rorelte angin an awm renga; thil zawng zawng chu I chhiahhlawhte an ni si a. I dan chu ka lawman ni suh sela chuan, ka hrehawmnaah khan ka boral tawh tur a ni.






THUCHAH

Thupui : ‘Thil zawng zawng hi i chhiahhlawhte an ni’.

- Rbt C. Lalchawimawia

Audio



Kohhranhote tholeh kan Lalpa Isua Krista hmingin chibai ka buk a che u.
Tukin zing hun pawimawh tak maiah Pathian thuchah sawi tura Pathian leh kan Kohhran hruaitute kaltlanga chanvo pawimawh tak ka changve hi ka lawm tak zet a ni.

Naupang pual : KNP member neite chuan heng zawhna kan rawn dah hi kan chhan tir theuh dawn nia.

TUNGE KA NIH..?

1). Beram vengtu ka ni a. Ka beram vennaah Sakeite, Savawmte lo kalin ka beramte seh an tum thin a, mahse kei chuan hlau hauh lovin ka talhtum in ka lo vawhlum thin a. Ka lo upat deuh hnu chuan Israel Lal ka lo ni ta. Tunge ka nih le ..? - Davida.

2). Thlalerah ka cheng thin a, ka chaw chu Khaukhuap leh Khawizu a ni a. Jordan luiah mite baptismaka chantir thin a. Lal Isua pawh kha ka baptist a ni. Tunge ka nih le ..? - Baptistu Johana

3). Nu rethei tak ka ni a, ka pasal a thi tawh a, ka nu Naomi nen Moab ram atangin Bethlehemah kan pem a. Eitur kan neih loh avangin mi lovah buhto zawngin ka kal thin a. Tunge ka nih le..? - Ruthi

4). Ka nu leh pa ten min thihsan hma avangin ka pami Mordekaia’n min enkawl seilian a. Ka lo nulat chuan Lal Ahasuera nupui ka ni a. Hamana’n Judaho tihhlum vek a tum tum khan ka hnampui Judate chhanchhuak tu ka ni a. Tunge ka nih le ..? - Lalnu Estheri.



Tukina kan thupui atana ka thlan chu ‘Thil zawng zawng hi I chhiahhlawhte an ni’ tih a ni a, ka rilrua awm angte ka sawi chhuak thiam lo ang tih ka hlau hle mai.

Sam 119na phuahtu hian a nunah fiahna, harsatna nasa tak a tawk a, nimahsela, Pathian hmangaihna chuan atana tha turin a thunun niin a inhria. Milian te leh thuneitute’n nasa takin an tiduhdah a, heng harsatna a tuar avang hian a vui mai lo, a lungngai mai hek lova, hmangaih avanga atana tha tura Pathian rorel a ni tih a hmufiah tlat a ni. Heng a chunga thil thleng zawng zawngte hi Pathian thuhnuaia awm, a chhiahhlawhte an ni tih a hre chiang a, “Ka thinlungah chuan i thu te a ni ka hlauh zawk ni”, a ti thei tlat mai. Sam 119 : 71 kan en phei chuan, “I thuruatte ka zir theih nana tihhrehawma ka lo awm kha ka tan a tha a ni”, a ti hial a ni. “Tihhreawma ka awm hma kha chuan ka vak bo thin a, tunah hrehawmna ka tuar hnu hi chuan vak bo mai lovin I thu ka zawm ta zawk a ni”, atihna ang a ni.

Keini ringtute pawh hi Pathianin min fiahin, min thunun fo thin. Thuthlunghluiah chuan Pathian hi roreltu angin a inlantir a, dan leh thupek a pe a. Chung chu a miten an zawm tur a ni a, an zawm loh chuan hrem an ni thin. Thuthlung thar ziaah erawh chuan khawngaihna hun ala nih avangin roreltu ni lovin Pa angin a inlantir a, keini ringtute hi fa angin min en a ni. Pathian leh Kohhran inkar chu pa fa inkar thu anih avangin min hrem lovin min thunun zawk thin a ni.

Eng vangin nge kan fate kan thunun thin ..?kan fate’n kan thu an awihloh emaw thil thalo an tih changin kan vuain kan thunun fo thin. Hetiang a lo thlen chang hian nu leh pa te chu chhungril thuk takah kan fate kan hmangaihna avangin kan na vawng vawng thin. Kan hmangaihna avangin an awmdan pangngai aia tha zawka chher chhuah kan duh avangin kan thunun thin a ni.

Hebrai 12 : 7-8-ah chuan, “In tuar hi nangmahni thunun nan a ni; fate chunga tih angin Pathianin in chungah a ti a nih hi; pa thunun loh fa tu nge awm ngai le? Fa zawng zawng hlawh thin thununna chu hlawh lova in awm erawh chuan fa tak ni lovin, sawn in ni a ni ang asin,” tih kan hmu a. Vawiinah hian chhungtin mimal tinte kan harsatna tawh a in ang hauh lo ang. Heng harsatna kan chunga thlengte hi Pathianin a hriatloh engmah a awm lo, a chhiahhlawhte an nih avangin. Pathianin min hmangaih avanga tuna kan awmdan aia hman tlak, fel zawk, thianghlim zawk leh chak zawka a rawng kan bawl theih nana min buatsaihna a ni.

Khawtlang leh Rampum huapa kan thlir pawhin tuna kan hun tawng mekah hian Lalpa’n a rampum ang hian min buatsaih a tum hle ni te hian ka hre thin. Covid -19 avanga kan tawrhna piah lamah, vawk vulh tute tawrhna te hi a nasa hle mai. Whatsapp group ‘Vawkvulh lama tui mite’ tih groupah ka awm ve a, nitin khaw hrang hranga African Swine Flu avanga vawk chan report dawn tur a awm reng mai. Nu pakhat phei chuan an fanu lehkha zirna atana an vawk vulh an chan vek thu lungchhe takin a sawi a, he hri avanga khaw hrang hranga kan hriatpui lemloha harsatna tawk an va tam em..!! An neih zawng zawng senga hma la a, loan te hial puka chhungkua in tunnun nana vawk vulh tute chu an innghahna ber, kar lovah hri avangin an chan ta teuh teuh mai… a tuartu te tan hian ava na dawn em ..!! Ni 06.07.2021 thlengaMizoram khaw hrang hranga vawk thi zat chu 9859 a tling ta der mai.Henglo pawh hi harsatna kan tawn mek sawitur ava tam em !!.

Kan ram, kan hnam, kan chhungkua, mahni theuh te hi inbih chiang teh ang u. Lalpan kan chungah beisei a nei a ni ngei ang. Min hmangaih avanga,“Ama fapa ngei pawh zuah lova, kan zaa aia petu chuan thil zawng zawng pawh a thlawnin min pe tel lova ngem ni,”(Rom 8:32). Thil zawng zawng athlawna min pek tel turah hian kan harsatna pawh a tel a ni tih kan hriat a pawimawh hle mai. Pathian hremna a ngaia lungngaia kun mai lovin, hmangaihtu thil pek, min thununna, kan thlenchin atanga hmasawn leh zual tura min buatsaihna a ni tih hriaa heng harsatna kan chunga thlengte hi lawm chunga kan pawm theih a pawimawh hle mai. Rinawm taka harsatna tuar chhuak thin te chu an chhel telh telh a, an hman tlak telh telh thin.
Tin, khawngaihna zawng zawng Pathian, a chatuan ropuina chang tura Kristaa kotu ngei che u chuan rei lo te in tuar hnuah a siam tha famkimin, a tinghetin, a tichak ang che u. (1Pet. 5:10). Vawiina kan tuar mek harsatna te hi kan nun siam thaa, tingheta, tichaktu tur a ni tih hriain, Lal Isua Krawsah i kir ang u, Krawsah chauh damna a awm a ni. Vawiinah hian kan nun khalh kal turin Lal Isua I thlang ang u, chu chauh chu kan tan damna a ni e. Mihringin vanduaina kan tih hi a hmangaihna lantirtu a ni fo zawk thin. “Aw ka nunna engahnge I kun reng? I Pathian beisei rawh”, Thil zawng zawng hi a chhiahhlawhte an ni si a.
A thu kan sawite, Lalpa’n kan zaa tan mal minsawm sak theuh rawh se. Amen

Pathian fakna hla:- KHB No 179 - ‘Isu Kraws mi hnaih tir rawh’

Isu, kraws min hnaihtir rawh,
Tuikhur hlu awmna kha;
Damna tui mi tin chhuahna,
Kalvari-a luang kha.

Krawsah chuan, kraws-ah chua,
Ka ropui awm rawh se,
Ka thlarau lui piah lama
Lawm taka chawlh thlengin.

Kraws kiangah thlarau khurin,
Khawngaihnain min tawk;
Varparh arsi eng tak chuan,
Ka vel a chhun eng e.

Aw, Pathian Fa kraws hlu chu,
Ka mit hmuhah thlen la,
Hahdam turin min pui la,
Ka chung zawn tihlim rawh.

Kraws kiangah ka nghak reng ang,
Beisei leh ring chungin,
HMun mawi tak ka thlen thlengin,
Lui ral lehlamah chuan.



LALPA TAWNGTAINA.