Khb No: 346 -'Aw Pathian nang man chanchin tha min pe'
Aw Pathian, Nangman chanchin tha min pe,
Lawmthau kan hrilh che - a zarah.
Haleluia! Amen.
Ram zawng Zawng chung khaw thim tak a leng,
Entu a lang ta - Isua.
Haleluia! Amen.
Ram tin hnam zawng zawng khawvar eng rawh se,
Tidamtu chanchin nenin.
Haleluia! Amen
Audio
TAWNGTAI RUALNA
Tawngtaina a Hriat Turte
Chanchin tha min pek avangin Pathian hnenah kan thinlung tak takin lawmthu i sawi ang u.
Chanchin tha min hrilh tute Sap upa leh Pu Buanga te leh Zosap missionary zawng zawngte avangin Pathian hnenah lawmthu i sawi thar leh ang u.
Chanchintha pek chhuah ve na kawnga kan mawhphurhna tha taka kan hlen chhuah ve zel theih nan Pathian tanpuina i dil ang u.
Missionary zawng zawngte tan i tawngtaisak ang u.
Sam 126:1-6
Lalpan Zion-a min hruai kîr leh lai khân, mumang emaw kan ti.
Kan nui hawm hawm a,
Hlimin kan au chêl chûl bawk a.
‘Lalpan an tân thil ropui tak a tihsak a nih hi,’
Hnam dangte chuan an ti.
Lalpan thil ropui tak min tihsak a,
Kan hlim êm êm a ni.
Lalpan sala kan tâng min hruai kîr leh ta a,
Thlalêra lui tui a luang leh ta ang hian.
Mittui tla chunga tuhtute chuan
Hlim takin an seng a,
Ṭap chungin buh chi feh chhuahpui mah sela,
An buhphalte kengin hlim takin an lo haw leh ang.
Nehemia 8:10
Haw ula, ruai ṭheh rawh u. In uain leh chaw chu a nei ve lote eipui ang che u. Vawiin hi kan Lalpa tân ni serh a ni a, ngui suh u, Lalpa-a in lâwmna chu in chakna a ni si a,” an ti a.
THUCHAH
Thupui: ‘LALPA A LAWM KAN CHAKNA’
- Upa C. Lalzarmawia
Audio
Vawiin January ni 11. 2021 ‘Missioanary Day’ kan tih Mizoram a Chanchin tha thlenni champha a kum 127-na lai kan lo thleng leh ta a.Mizoram Sorkar pawhin State Holiday-ah hial a puang a ni a.Kum engemaw zat chu Mizoram Kohhran lian Pahnih Presbyterian Church of Mizoram leh Baptist Church of Mizoram chuan lungrual tak leh ropui takin kan lawm thin a nih kha.Nimahsela, Setana hnathawh avangin kan lungrual thei ta lova, Baptist Church of Mizoram ta ang hiala thil kal tirin he ni hi khawhar ang reng takin kan hmang ta hi a pawi hle a ni.Chuvangin he Missionary Day-ah hian hre thar leh ila ka duh chu he Chanchin tha thlen ni hi(Missionary Day) hi tu Kohhran ta mah a ni lova,Kohhran tin te hian a hlutzia hre thar a ‘Lawm thusawina’ (Thanks Giving Day) atan hmanga ropui taka lawm hi a phu em em a ni.
Awle, zanin ‘Missionary Day’ Kohhran ni pawimawh a kan hotuten thuchah sawi tura min han ruat ve hi ka lawm hle mai.Hetih lai hian Kan BCM ni pawimawh Bu-ah chuan thupui an lo dah sa thlap a awm a,chu chu ‘Lalpa a lawm kan chakna’tih a ni a. he thupui hmang hian hun reilote Pathian thu kan ngaihtuahho lawk dawn a ni.
Zanin kan thupui hi nguntakin ka ngaihtuah a,eng vangin nge kan hotute hian he thupui hi an thlan tih te ka ngaihtuah a a tawpa ka rilru a lo awm ta chu kan Zosap Missionary ropui Pioneer Missionary Pahnih Sap Upa(Rev FW Savidge) leh Pu Buanga(Rev. JH Lorrain) avanga Mizoram hnam leh Kohhranin malsawmna kan dawn nasat zia ngaihtuah a, anmahni rawn tirtu kan Pathian hnena lawm thusawi na chang kan hriat hi kan Kohhran leh ram, mimal nun tan chakna,malsawmna thar kan dawnna tur a lo ni . Nimahsela, tun kum erawhchu Covid 19 hripui avangin kohhran tinte hian ropui takin kan hmang thei lova,kum lokal zel turah erawh chuan nasa takin, ropui takin ,Lalpa Pathian hnenah lawm thu nasa takin sawi ila;hei hi kohhran leh mimal tan chakna leh malsawmna a lo ni dawn ni.
1. HMANLAI MIZOTE DINHMUN :
Kan thupui Lalpa a lawm kan chakna tih hi a fiah leh zual theih nan hmanlai kan Pi leh Pu te din hmun hi han sawi ta lawk ila a tha awm e. Hmanlai kan Mizo nun hi a tak tak a han bih chian chuan a lo thalo hle mai a ni, Ramhuai hlauvin an awm a,Ramhuai tih lawm nan vawk leh ar ten an inthawi a,Ramhuai hlauh vangin an duh dan danin In an sa thei heklo,an duh lai lai lo-ah pawh an nei thei hek lo.Hlauhna leh Puithuna in nasa takin ro a rel a,thimna in ram pumpui chu a tuam tak meuh thin a ni.
Hei bakah hian, Mihring leh mihring an inthat a,khua leh khua, hnam leh hnam indona leh in run a tam em em thin a ni.In thah,mi lulak an ching em em a,an chhehvel hnam dangte pawhin an hlau em em thin a ni.Hmeichhia leh mi retheite dinhmun a hniam em em a,ei leh In a chhia a,mihring a tlangpui thuin an dam reilo hle bawk a ni. Khawvel dang nen an intlawh pawh lo hle a,an mawl em em a ni.
2. SAP UPA LEH PU BUANGA LALPAN MIN PEK AVANGIN LALPA PATHIAN HNENAH LAWMTHI I SAWI ANG U:
Kan thu Pahnihna atan chuan kan Pioneer Missionary Pahnih Sap upa leh Pu Buanga Lalpan Mizote min pek avang hian nasa takin lawm thu i sawi ang u tih hi a ni. A nihna takah chuan an ni hi Tripura a thawh tum an ni a, mahse Tripura Lal(Maharajah) khan a lo duh lova, Mizoram an lo hawi thei ta chauh kha a ni a.Tichuan January ni 11 .1894-ah Sairangah Tlawng lui rawn zawh chhovin Mizoram an rawn lut thei ta chauh a nih kha.
He Chan chin tha thlen ni-ah hian Pu Buanga leh Sap upa minpe tu Lalpa Pathian hnenah hian nasa takin lawmthu sawi ila,Lalpa i fak ang u chu chu mimal leh ram leh hnam ang a kan chakna leh malsawmna kan dawnna tur a ni ngei ang. Zaninah hian kan Pioneer Missionary Pahnih Sap upa leh Pu Buanga kal tlanga kan ram leh hnam tana thil min tihsak hi a ropuizia leh a hlutzia point thum lek i han tarlang teh ang u:-
1). Zirna (Education ) bul min tansaktu an ni : He Pathian tirh mi ropui pahnih inkawp fuh em em te hian Mizorama an lo luh khan Aizawlah April 2.1894 khan Sikul hma sa ber kha an rawn din a,A,AW,B min han siamsak leh nghal bawk a nih kha.Hei bakah hian Lushai- English Dictionary te an han siam bawk a, Bible bu thenkhat Mizo tawng ngeiin an han letling nghal bawk a,zirna (Education) bul min rawn tan sak ta a nih kha.
Helaia ka han sawilan duh pakhat chu British Sorkarin Mizoram an awpna atana Bengali tawng hman tur a hma an lakna leh ruahmanna an siam chu kan Pioneer Missionary Sap Upa leh Pu Buanga hmalakna avang hian Mizo tawng leh English chu hman a lo ni ta zawk a ni. Vawiinah hian Sap Upa leh Pu Buanga minpe tu Lalpa fak leh chawimawh hi a va phu em, Lalpa fak leh lawm thusawi nasa apiang hian chakna malsawmna an dawng zel thin a lo ni tih hriain lawmthu sawi na chang hi i hre thar leh teh ang u.
2). Damdawi(Medical) Hmangin rawng an bawl :- Sap Upa leh Pu Buanga hi kan ram leh hnam tana an tangkaina em em chu tihdamna (Medical) hmangin rawng an rawn bawl hi a ni.Mizorama an rawn chhuah vawi 2-naah khan Serkawn-ah 1903 khan Dispensary an rawn din a,thing tlang leh a khaw chhehvel atangin damlo leh damdawi mamawh tam takin an rawn pan a ni.Vawiin a Christian Hospital Serkawn kan tih tak hi a lo din chhuahna bul pawh a lo ni ta a ni.
Vawiinah hian kan Pathian hian he Pasaltha Pahnih Sap upa leh Pu Buanga min pe hi vawiin Zorama chanchin tha lo thlen ni –ah hian anmahni avanga lawmthu sawiin, Lalpa Pathian fak leh chawimawina i hlan mawlh mawl ang u. Chu chu kan chakna leh malsawmna kan dawnna kawngka chu a lo ni reng mai tih hi ka sawi duh a ni.
3). Kohhran mumal takin an rawn din :- A pathumna a ka han tarlan duh chu Kohhran mumal takin an rawn din tih hi a ni.Tichuan, Sap Upa leh Pu Buanga hian Kohhran an rawn din dawn hian an fimkhur em em a,Sapram kohhran kalphung din an tum lova, mizo culture mil kohhran din an tum tlat a ni.
Tin, kohhran an din hian an thil tum ber Pakhat chu mahni kut ke a ding thei turin Zosap an awmloh hunah pawh an aiawh thei tur mithiam an chher chhuak a - entirnan Rev Chuautera,Rev Challiana,Pu Lalmama,Pu Liandala leh mi tam tak Kohhran leh zirna lama chhunzawm thei tur mi an chher chhuak teuh mai hi an ropuina pakhat chu niin ka hria a ni.
Kan rawngbawlpui pakhat phei chuan Mizo hnampa hi thlang dawn ta ila kan ram leh hnam tana an thil tih en chuan Mizo hnampa nih hi an phu ber e a ti a ,kei pawh hian a dik ka tiin ka pawmpui hle a ni.
3. LALPA A LAWM KAN CHAKNA :- Kan thupui innghahna Nehemia 8:10 thu “Lalpa chunga in lawman chu in chakna a ni si a” tih a nih kha.Helai thu hi nguntaka kan en a kan zir chuan Israelte khan Mosia dan Bu hun rei tak an tihbo tawh,chu an hmu chhuak leh ta a, chu Mosia dan bu an han chhiar chuan Israel-ho chuan dan leh hrai tam tak an lo zawm tawh lova,an bawhchhe nasa a ni tih an han hriat chuan mipuiho chu an tap an tap ta mai a.Tichuan, Ezra leh Levi-ho chuan mipuiho hnenah chuan “Kal ula thil thlum in ula…vawiin hi kan Lalpa tana ni thianghlim a nih hi…Lungngaiin awm suh ula..Lalpa chunga in lawmna chu in chakna a ni si a,” tiin fuihna thu ropui tak an rawn chhak chhuak ta a nih kha.Tichuan mipuite chuan a hnu lam kan chhiar zel chuan an sualte an puanga,Pathian fakna leh chawimawina hun nasa taka hmangin tawngtaina hun te an nei a ni tih te kan hmu ta a ni.
Vawiinah pawh hian kan ram leh hnam tana Lalpan Sap upa leh Pu Buanga hmanga thil ropui tak min tih sak hi kan sawi a, kan hria a, Lalpa chunga lawm na chang kan hriat a, lawm thu kan sawi hi a lo va pawimawh tak em ka ti a ni.Chu chu kan chakna leh chung lama atanga thlarau lam malsawmna kan dawnna tur kawngka a lo ni reng tih hi ka han sawi duh a ni.
Sam 126:1-6 kan chhiar takah khan enge kan hmuh kha, “Lalpan Zion salte a hruaikir lai khan,mumanga mangtute ang mai kan ni a…Lalpan thil ropui takte min tih sak a kan lawm hle a ni.” tih kan hmu a ni. He laiah hian Sam ziaktu hian a sawi tum ber chu Israel fate chu mi ramah salah rei tak an tang a,hreawm takin an awm thin a ni tih Bible hmun tam takah kan hmu a ni. Nimahsela Zion sal tangte chu Lalpa Pathianin mak tak leh ropui takin hruai chhuah an lo ni ta a nih kha.Chuvangin Israel fate chu anmahni chhan chhuaktu Lalpa chungah lawm em em mai a,an ka chu nuihna leh hla sakin a khat a ni tih kan hre thei a ni.Tichuan, ‘Lalpan thil ropui takte min tih sak a kan lawm hle a ni’ tiin Lalpa Pathian chu an fak a,an chawimawi a ni tih kan hre thei a ni.
Unau te u,vawiin Missionary Day-ah hian thim ata eng mak tak a min hruai luttu kan Pathian chu fak ila, chawimawi ila, a chungah lawm thusawi ila chu ngei chu kan Kohhran leh mimal tan a chakna, malsawm kan dawnna tur a lo ni.Lalpa chunga lawm nasa,Lalpa fak leh chawimawina nasa apiang nun hi a chak a, thil a tithei a ni tih i hra ang u.Lalpa chunga in lawmna chu in chakna a ni si a.
Pathianin kan thusawite mal min sawm sak theuh rawh se. Amen!
