SERKAWN TUALCHHUNG KOHHRAN

CHANCHIN THA MI TIN TAN

PROGRAMME






MISSIONARY NI ZING INKHAWM PROGRAMME

10:00 AM, 11th JANUARY, 2021
MISSIONARY DAY:

PROGRAMME:




.

Khb No: 346 -'Aw Pathian nang man chanchin tha min pe'

Aw Pathian, Nangman chanchin tha min pe,
Lawmthau kan hrilh che - a zarah.
Haleluia! Amen.

Ram zawng Zawng chung khaw thim tak a leng,
Entu a lang ta - Isua.
Haleluia! Amen.

Ram tin hnam zawng zawng khawvar eng rawh se,
Tidamtu chanchin nenin.
Haleluia! Amen

Audio

TAWNGTAI RUALNA

    Tawngtaina a Hriat Turte
  1. Chanchin tha min pek avangin Pathian hnenah kan thinlung tak takin lawmthu i sawi ang u.
  2. Chanchin tha min hrilh tute Sap upa leh Pu Buanga te leh Zosap missionary zawng zawngte avangin Pathian hnenah lawmthu i sawi thar leh ang u.
  3. Chanchintha pek chhuah ve na kawnga kan mawhphurhna tha taka kan hlen chhuah ve zel theih nan Pathian tanpuina i dil ang u.
  4. Missionary zawng zawngte tan i tawngtaisak ang u.



Philippi 4:4;
Lalpaah chuan lâwm fo rawh u; ka ti leh pek ṭhîn ang, lâwm rawh u.
Nehemia 8:10
Haw ula, ruai ṭheh rawh u. In uain leh chaw chu a nei ve lote eipui ang che u. Vawiin hi kan Lalpa tân ni serh a ni a, ngui suh u, Lalpa-a in lâwmna chu in chakna a ni si a,” an ti a.



THUCHAH

Thupui: ‘Lalpaah chuan lawm fo rawh u’

- Rev R. Lalthangliana

Audio





Vawiin Missionary Day 11th January hun pawimawh tak chang tura Pathianin kan kohhran hruaitute kaltlanga duhsakna min chantir hi ka lawm hle. Kohhran member zawng zawngte Missionary Day chibai ka buk a che u.

Kumin 11th January hi Mizoram sawrkarin ‘Missionary Day’ ti a ram pum huap chawlh (state holiday) a puan kum 1989 atanga chhiara kum 33-na alo ni ve leh ta reng mai. Kum 1894 January ni 11 kha zosap missionary hmasaberte pahnih Sap Upa leh Pu. Buanga (FW.Savidge leh J.H.Lorain) ten chanchintha hril tura Mizoram leilung an rawn rah tan ni kha a ni a. Hemi ni atang hian chanchintha chuan engtiklai maha chhuahsan tawh lo turin kan ram chu a chamchilh hlen ta a ni. Chuvangin Mizorama kohhran lian pahnih, Baptist Church of Mizoram leh Mizoram Presbyterian Kohhran te chuan Mizorama chanchintha lo thlen niah pawmin, kohhran din tan niah a puang ve ve a ni. Hei vang hian chanchintha lo thlen kum 50-na pawh 1944-ah khan kan lawn dun a ni a, heta thawhlawm tlingkhawm atang hian Baptist Kohhran chuan Jubilee Bible School a din nghe nghe a. Tichuan 1994-ah kum 100-na (Gospel Centenary) pawh lungrual taka lawmho leh niin hetah hian Mizoram Presbyterian lamin “Maichama mei chu a mit tur a ni lo” tih thupui an hmang a, BCM lamin “Isua Krista chu lei leh van Lalber a ni” tih an hmang ve thung a ni.

Missionary Day hi kohhran mal ta bik ni lovin Mizorama kohhran awm zawng zawng tan a ni. Kan zosap missionary ten zofate tan thil tha an rawn thlen hi a hluin a ropui em em a, theihnghilh phal chi a ni lo a ni. Chanchintha hmangin kan ram hmelhmang chu nasa takin min thlaksak a, kawng tinrenga hmasawnna tur lungphum chu min phumsak a ni. Missionary Day hi hlut nachang hria ila, kohhran tinten Pathian hnena lawmthusawi inkhawm hunah I hmang ang u. Kumin 11 January 2021 Missionary Day thupui atan a kan thlan chhuah chu –‘Lalpaah chuan lawm fo rawh u’ (Philippi 4:4) tih hi a ni a (Ni pawimawh 2021) a inhmeh hlein ka hria.

Philippi khua hi Rom sawrkar bial khat, makedonia rama khaw pawimawh tak a ni a, Europe rama kohhran din hmasak berna khua a ni. He lehkha hi Paulan lungin a tan laia a ziak a ni a, mi tam takin Rom khuaa a tan laia a ziak niin an ngai a, Ephesi khuaa a tan chhunga ziak anih ring an awm bawk. Chanchintha hril ve tho si in, amah dodal tuten a rilru an tibuai hle. Philippi khuaa zirtirna diklo thehdarh tute pawhin a rilru an tina hle bawk a, chutiang thil chu awm mahse, hlim tak leh ngaihtha taka Paula a awm thei hian Krista a rinzia a tilang chiang hle. A tlakchham lai taka Philippi kohhran ten tanpuina an rawn thawn thin avangin lawmthu a sawina lehkha a ni a, heng harsatnate hian ringtute tlakbuak thin mahse chhel tak leh huai taka awm zel turin a fuih duh bawk a, mahni hmasiala chapo taka khawsa lovin Krista rilru ang inngaihtlawmna rilru pu turin a fuih bawk a ni. Judate dan an zawm vang ni lovin rinna avang zawka Pathian khawngaih thilpek Kristaa an nun chu dawng an nih a kawhhmuh a, Kristaa awmte chu Pathianah lawmna leh thlamuanna a pek thin thute a sawi lang bawk. Paula hi tihhlum hmabak mai nia alang chung hian a lawm thei em em a, ngaihngam takin a awm a, kristian nunah leh rinnaa inpumkhat naah beih hram a tul thu a sawi uar hle. Philippi kohhran Paulan a ngainatzia a lang chiang hle bawk a, he lehkhathawn hi ‘lawmna lehkha’ ti hiala sawi a ni bawk.

‘Lawm nun chu enge ni ta ang ? Paula nuna thil langsar tak kan hmuh thelh theih miah loh chu Kristaa a lawmna nun hi a ni. Hemi awmzia chu chanchintha nen a nun a inzawm chinah chuan, eng lungngaihna leh hreawmna mahin a delhbeh zawh loh thlamuanna a neih vang a ni a, chu chuan a nun a khalh kal tlat a, tin, chu ‘lawm nun’ chuan Pathianah chakna a neih tir bawk a, hnehna ropui tak a chantir thin a ni.

1. Lawm nun chu Krista nena inzawm nun a ni:
Pathianin zosap missionaryte hmangin chanchintha engah min hruai lut a, thim ata engah min awmtir a Lalisua (min chhandamtu) ngei chu kan nunah pekin kan awm ta, chu Isua ngei chu kan engkim atan kan hmang ve anih chuan ‘lawm nun’ chu keimahniah theuh hian lungngaihna leh beidawnna karah pawh alo par chhuak thin a ni. Paula chuan ‘Kei atan zawng nun hi Krista a ni a, thih pawh hlawkna’ alo tih angin, mihring nunah ‘thih leh dam’ inkara thil thleng thei zawng zawng hian ama nun a chawkbuai phak lova, chutiang nun neitute tan chuan Lalisua lawm nun hi an nei thin a ni.

2. ‘Lawm nun’ chu I kawl tlat atan pek I ni:
Zofate hi missionaryte kaltlanga chanchintha hmangin min rawn zawng chhuak mai a ni satliah lova, chu chanchintha kawltuah chuan min ruat nghal a ni. Kawltu leh neitu chanchang kan nih takzet chuan kan mawhphurhna liau liau a ni tawh. Chanchintha Lalisua ngei chu kan nuna roreltu, min chenchilh tlattu alo ni ta a, englai pawhin min chenchilh a, a rorelna leh thuneihna hnuaia kan nun a zalen tlat chuan ‘lawm nun’ chuan min chenchilh a, ‘thil engpawh ka chungah thleng se, lungngai lovin ka lo lawm ang’ tiin Lalpaa lawmna chuan lungawina min thlen thin a ni.

3. ‘Lawm nun’ chu neitu chanchang nun a ni:
Kan chang innghahna ‘Lalpaah chuan lawm fo rawh u’ (Philippi 4:4) tih thu hian tobul innghahna pawimawh tak a nei a, Lalpaa lawm fo tura min fuihna satliah mai a ni lova, chhan leh vang nei lova lawm ringawt tura beisei kan ni hek lo. Lalisua, chatuan nunna rochana neitu kan nih avang zawk a ‘lawm nun’ nei tura fuih kan nihna zawk a ni. Neitu chanchang kan nih chuan mawhphurhna pawimawh tak kan nei nghal a, midangte mawhphurhnaa dah khawtlai lova, keimah ngei hi mawh latu tur ka ni tih inhriatna hi a pawimawh hle, chutichuan Lalisua rorelna leh thuneihnain ka nun a paltlang tam pouh leh lawmnain kan nun alo khat thin a ni.

4. ‘Lawm nun’ chu Lalpaa lawmnaah a innghat a ni:
Hripui leng avanga hun harsa kan tawng mek lai hian Lalpaah lawmna kan nei em ? Lalpaa innghat tlatte nunah chuan hetiang hun khirh karah pawh hian lawmna tur tam tak an chharchhuak thin a ni. Mihringte hian duhthu kan sam thin a, chung kan duhthusam thilte chu kan neih theih chuan lawm tura inngaihna lian tak kan nei thin, nimahsela hei hi lawmna hnar a ni lova, lungngaihna min thlentu mai an ni zawk. Pathiana lawmna hi kan lawmna innghahna tur zawk a ni a, kan chakna leh thiltihtheihna pawh a ni zawk a ni. ‘Lalpa chunga lawmna chu in chakna a ni si a’ (Nehemia 8:10) Nehemia in a tih ang khan kan thupui pawh hian ‘Lalpaah chuan lawm fo rawh u’ min ti a ni. Chutichuan Lalpaa lawmna chu Pathian rorelna leh thuneihna hnuaia intukluh vekna atangin alo awm thin a, a hnena intulut thang apiangin Lalpaa lawmna nun an experience tam thin a ni.

‘Lalpaah chuan lawm fo rawh u’ tih thupek kan hmuh ruala kan hriat ngei ngei tur chu duhsakna vawrtawp min hlan a ni tih hria ila, keimahni leh Pathian inkara kan inzawmna chhe tawhte siam thar leh ila, mawhphurhna danglam chuang lo Lalpan khawngaihna avanga min pek hi vawiin Missionary Day ah hian I thar thawh leh ang u.
Lalpan a thu malsawm rawh se. AMEN.

Lalpa Tawngtaina