SERKAWN TUALCHHUNG KOHHRAN

CHANCHIN THA MITIN TAN

PATHIANNI ZING PROGRAMME

10:00 AM, 10th May, 2020

PROGRAMME:

HUN KAIHRUAITU:
  • Tawngtai rualna
      Tawngtaina a Hriat Turte
    1. Kohhran hote Pathian biak inkhawm a huhovin nei thei rih lo mah ila, kan inchhungkhur theuhah Pathian chibai bukna nung kan neih a, ringtu chak zawk kan lo nih theih nan leh Thlarau Thianghlim pawlna kan chan theih nan.
    2. Covid19 avanga khawvel tuar tu zawng te tan. Covid19 hrileng hi a lo reh theih nan leh a damdawi leh invenna vaccine hmuh chhuah thuai anih theih nan. Mipui ten kan tih ve theih tawk thuneitute thuawih leh fimkhur taka khawsak kan ngaihpawimawh zel theih nan.
    3. Rev VL Hruaia Khiangte chu a tha zelin, damdawiin alo chhuahsan thei ta hial a, Pathian hnenah lawmthu i sawi ang u. Tin, kan Mizo pui he hri avanga harsatna leh buaina tawk mek, hmun hrang hranga awmte tan Pathian awmpuina leh thlamuanna i dil sak ang u.
    4. Ram hruaitu, thupek kengkawhtu, Task force leh service hrang hrang a thawktute leh tihdam rawngbawlna hna thawktute tan. A bik takin khawchhe kara border area a duty te tan dil sak ila.
    5. Lockdown avanga India ram hmun hrang hranga Mizo tangkhang zawng zawngte tan.
    6. Covid19 Lockdown avanga ei leh bar leh thil danga harsatna tawk zawng zawngte tan tawngtai sak ila. Kohhran mipuiin kan ngaihven a, anmahni chhawmdawlna hi kan mawhphurhna a ni tih kan hriat tlat theih nan. Kut hnathawka ei zawng tute tan. An hna a hun taka an chhunzawm theih nan leh an hnathawh Pathianin mal sawm sak turin dil pui ila.
    7. Kan missionary zawng zawngte tan, kan kohhran chhungkua atanga missionary chhuakte tan, kan Zosap missionary Pi Zomawii tan.
    8. Kan kohhran member leh kan veng mite damlo, Christian Hospital leh hmun danga enkawl mekte tan.
    9. Kan biak in zawi zawiin kan ka kal ve reng a, a thawktute leh enkawltute tan remhriatna leh Pathian atanga finna i dil sak zel ang u.
    10. Kan thuchah ngaihthlak tur leh kan thawhlawmte kan hlan bawk ang.

    • Special Item (Nei thei remchangte tan)

  • Bible chhiar tur:
    • THUCHAH:
    Kei atan zawng nun hi Krista a ni si a
    - Rev R. Lalbiakliana
    Audio

    STK member zawng zawngte chibai ka buk a che u. Tirhkoh Paula hian Philippi khua hi missionary zin vawi hnihnaah a tlawh a, Ludi leh tang vengtu chhungkua ringtu an lo nih hnu khan kohhran a lo ding ta a. Paula leh he kohhran hi lungrual taka rawngbawl dun a ni. An hnena lehkha a thawnah Paula hian a nun chhan ber chu engdang ni lovin Krista tan chauh a ni, a thih pawhin atan hlawkna tur tho a ni tiin a hrilh a. Kan tunlai hun tawn meka nun leh thih kan buaipui em em lai hian he lai thu hi i ngaihtuah thar leh teh ang u.

    A hmasa berin kan nun chhan kan hriat dik theih nan heng zawhna hi inzawt theuh ila: Eng atan nge Pathianin min siam?. Engvangin nge ka lo pian?. Tun thlenga ka la dam ve chhan engnge? tiin. Hengte hi dik taka kan chhan theih nan nun awmzia kan hriat chian a ngai.

    Nun chu Pathianin ama anpuia a siam, nunna nei dangte aia ropui daiha a siam anih vangin a duhawmin a hlu em em (Sam 8). Lal Isuan nun hi thil dang zawng zawng aiin a hlu, silh leh fen, ei leh in aiin tih a sawi (Mt.6:25-26). Khawvela thil hlu ber leh ropui berte pawh hi mitthi tan hlutna leh duhawmna pakhat mah a awm lo, thil zawng zawng hlutna pawh hi kan nun zara hlu mai an lo ni. Chuvangin tunlaia ‘ka nun a ni a, ka thu thu a ni mai’ tih ang hi chu a ni ngawt lo.

    Nun chu taksa, rilru leh thlarau infin, pian leh thih inkar hi a ni. Nun chu hun reilote atana Pathianin min puktir a ni. ‘Lalpan a pe a, Lalpan a la leh ta’ (Joba 1:21) tih ang khan. Nunna chu vawiinah a awm a, naktukah a liam leh mai thin. Nun hi hlimthla ang leh pangpar mawi tak reilotea chuai ang a ni. (Joba 14:1-2). Nun chu thawnthu angin a tawp (Sam 90) thin a, chhum rei lote lo langa ral leh ang a ni bawk (Jak 4:14).

    Anih leh kan nun hi engtinnge kan hman ang a, tu tan nge kan hman ang le? Sawi tur tam tak a awm thei a, a then chauh sawi ila:
    1. Pathian thu chuan ‘engkim ama siam a ni a, ama ta tur bawka siam a ni’ (Kol.1:16) tia a sawi angin nun chu a siamtu tan hman tur a ni. Tirhkoh chuan a nun chhan a hriatchian em avangin ‘kei atan zawng nun hi Krista a ni’ a ti. Keini pawh thisen hmun khata hrin ve bawk kan ni a, Krista tana nung tur kan ni.
    2. Chanchin tha hril tura thu pek kan ni. (Mk.16:15). ‘A nungte chu anmahni tan an nun tawh lova, an thih aia thi atan chuan an nun tawh zawkna turin a ni a thih ni’ (2Kor.5:15) tia kohna kan dawn hi ringtu zawng zawngte mawhphurhna a ni, tumah awlna pek a ni lo. Ringlote hnena chanchin tha hril tur kan ni.
    3. Thil tha ti tura siam kan ni (Eph.2:10). Kan mihring puite tana rawngbawl, thil tha tih hi kan nun chhan pakhat a ni e. Tirhkoh chuan ringtu chhungte tan phei chuan tih leh zual tur a ti. Hmeithai, rethei, dam lo etc te rawngbawlsak tur a ni.
    4. Genesis, Sam No.8 leh Rom 8-ah thil siam dangte enkawl tur leh an tan malsawmna ni tura koh kan nih kan hmu. Tunlai hripui leng vanga mihringte kan tawmim lai hian thilsiam dangte an zalen ve hle tih kan hmu thei. Thil siam dangte tan nundan thar kan neih a pawimawh hle.
    5. Kan taksa hi a siamtu duhloh zawngin a hman theih, hmang pawh kan tam hle. Chuvangin kan hlim tur angin kan hlim thei lo va, kan neih tur ang kan nei lo va, kan chan tur ang chang lovin kan thlen tur ang thleng phak lovin kan dam chen tur pawh dam lovin kan awm bawk thin. Kan taksain harsatna tam tak kan tawh fote hi keimahni siam a tam mai. Chung harsatnate chu nun dan (life-style) dik loh vang a ni. Chuvangin siam thatna leh a damdawi pawh keimahni ngei chinfel theih deuh vek a ni.
    6. Nun hi chhawng thum angin sawi ila: Nu pum chhungah thla 9 vel, tuna kan nun kum 70/80 vel, thih hnu nun, tawpchin nei lo. Pum chhunga kan awm hi a dawt leh atana kan inbuatsaihna pawimawh tak a ni. Chutiangin tuna kan nun hi thihhnu nun, chatuan atana kan inbuatsaihna a nih vangin Lalpa duh danin i nung theuh ang u. Mifing pakhat hian a zirtirte chu an thih hmain thi tura inpeih diam turin a fuih a, a zirtirte chuan an hnial a, “naktukah kan thi mai thei a lawm” tiin. A ni chuan “A dik e, chuti chu vawiinah inpeih rawh u” tiin a chhang a.

    A tawp berah chuan kan damchhunga hlim leh thlamuanga kan nun theihna awm chhun chu nun min petu Lalpan min pek chhan ang taka kan hman hi a ni. “Tumah mah ni tana nung kan ni lo va, tumah mahni tana thi kan ni hek lo. Kan nun chuan Lalpa tan kan nung a, kan thih pawhin Lalpa tan kan thi a ni si; chuvangin kan nun pawhin, kan thih pawhin, Lalpa ta kan ni” (Rom 14:7-8). Lalpan kan za tan mal min sawm rawh se. AMEN.

    LALPA TAWNGTAINA