SERKAWN TUALCHHUNG KOHHRAN

CHANCHIN THA MI TIN TAN

PROGRAMME






PATHIANNI ZING INKHAWM PROGRAMME

10:00 AM, 10th JANUARY, 2021
SUNDAY SCHOOL CAMPAIGN:

PROGRAMME:




Call to worship : “ I thu hi ka ke atan khawnvar a ni a, ka kawng atan eng a ni “ (Sam 119 : 115).

Hla No 564 : “ Sande sikul i kai ang u “(Thilpek lakkhawmna)

Sande sikul i kal ang u,
Mi tin tan a lo ni si;
A pui a pang kai ho zel se,
A hmei a pa tan a ni.

Lo kal r'u, a that chu,
Kan ramah zung kai sela;
Hemi hi a hlu si,
Kan hnam a chawimawi ang a.

Baibul chhiarin an ngaihtuah thin,
Pathian leh mihring thu hlu;
Thu lau, mi a phak tawk a awm,
A thuk pawh, Pathian rilru.

Krista chanchin mawi duhawmte,
Chhandam kawngte min hrilh chu;
Dam lai chet mawi theih min zirtir,
Thih muan theihna min kawhhmuh.

KOHHRAN MEMBERTE HNENA HRIATTIRNA : 10th JANUARY 2021

TAWNGTAI RUALNA

    Tawngtaina a Hriat Turte
  1. Pathianin Kum thar 2021 min hruai thlen avangin a hnenah thinlung leh tih takzetin lawmthu i sawi ang u. Kum thar ah hian a venhimna i dil ila, a hruaia kan awm theih nan Lalpa Thlarau thianghlim tanpuina i dil ang u. Kan nuna fel lo leh sim ngai te a tanpuina a kan paih theih nan i dil ila, Ama tana tangkai zawka nung turin i inhlan thar ang u.
  2. Pathian thu zir taimakna, zawm tak tak duhna thinlung leh thlarau atanga hriatthiamna Pathian hnenah i dil ang u.
  3. Chhungkaw maicham pawimawh em em hi vawng nung zel thei turin Pathian tanpuina i dil ila, hemi kawnga nu leh pa mawhphurna kan hlen theuh theih nan chakna i dil ang u.



Hebrai 4:12
“ Pathian Thu hi a nung a, thil a ti thei a, khandaih hriam tawn eng ang ai pawhin a hriam a, nunna leh thlarau, ruhtuah leh thling phel hrang khawp hialin a chhun thei a, thinlunga ngaihtuah leh tumte hi a hre nghal thei a ni “.




THUCHAH

Thupui: PATHIAN THUZIR PAWIMAWHNA:

- Upa R. Lalrosanga

Audio





Kan Kohhran hian kum tinin January thla Pathianni vawihnihna hi “Sunday School Pawl Siam Rem Ni” tia vuahin kum thar atan Kohhran mite Pathian Thu zir tura Sunday School kai tan ni atan kan hmang thin a. Chu mi denchhen chuan kan Bial chhung Kohhran tinah Pathian Thu zir pawimawhna in hrilh hriat tharna ni, Sunday School-a hming ziak tura in sawmna hun atan hmang turin Bial Sunday School Committee min ngen thin a, chu hun hmang tur chuan Sunday School Superintendent te hi hun pek kan ni thin a. Tukinah pawh hian Pathian Thu zir pawimawhna kan zir ho dawn a ni.

Mizoramah hian March ni 1, 1896 khan Sap Upa leh Pu Buanga te chuan Sunday School hmasa ber chu Aizawlah an lo tan a. Lunglei lamah pawh Sap Upa leh Pu Buanga lo chhuah leh hma 1902 khan ringtu lo awm hmasate chuan Tv Thankunga hovin Sethlunah Sunday School hi an lo tan ve tawh a. Sap Upa leh Pu Buanga lo chhuah khan Pu Buanga chuan Sunday School chu a enkawl nghal a, kum 1904 atang phei kha chuan Kohhran dinna khuaah tawh phawt chuan Sunday School hi din zel ni se, tiin an rorelnaah an lo pass tawh a. Kristian hmasate kha ring thar leh lehkhathiam lo an nih avangin Pathian Thu tlem tlem leh A,Aw,B te, ziak leh chhiar zirna atan te Sunday School kha an hmang deuh ber thin. Pi Zirtiri lo chhuah khan Pu Buanga kha Sunday School a enkawl pui a, Kohhran hotute’n Sunday School zir tur an buatsaih thin a, Indian Sunday School Union kan zawm phawt a, chumi hnu-ah chuan CEEFI zirlaibu kan hmang leh a, kum 2004 atang khan keimahniin Sunday School zirlai kan lo buatsaih ve ta a ni.

Mizoram Baptist Kohhranah chuan Sunday School hi Christian Education Department-in a enkawl a. Thil tum 4 (pali) kan nei a –

a) Mi bote Krista hnena hruai (Piangthar tura inzirtirna) – Beginner Pawl atanga Baptisma Zir Pawl thleng.
b) Mihring dik tak ni tura buatsaih (Kristian nun dan tha inzirtirna) – Intermediate Pawl
c) Kohhran mi diktak ni tura buatsaih (Kohhran tih nghehna tura inzirtirna) – Senior A Pawl
d) Pathian Thu dik taka pawm leh hman tir (Pathian Thu zira, hriaa, ataka nun pui tura inzirtirna) – Senior B Pawl.

1. Mi bote Krista hnena hruai:
Naupang rilru nem laia Isua Krista hriatna nunga an hriat tluka hlu leh nghet a awm kher awm lo ve. Naupang kaihhruai hi a awlsam lo va, tawngtaina nen tihtakzeta beih a ngai. Hun rei lo te chhung chauh rilru an pek theih avang hian an duhzawng leh lawm zawng kan tih pah hian kan thuchah laimu ber “Chhandamna” thu hi kan thun hram hram a pawimawh hle a ni. Anmahni thu kan hrilh hi a pawimawh rualin zirtirtute tawng kam, thil tih leh nun an en tel tlat avangin Sunday School zirtirtute hi kan fimkhur a pawimawh em em bawk. Sunday School-a kan zirtir lai chauh ni lovin, hun danga kan thusawi leh nun dan te, midang nena kan in laichinna kawngah te kan fimkhur fo a pawimawh hle a ni. Beginner Pawl atanga Baptisma Zir Pawl thleng hian kan thuchah laimu ber chu Chhandamna thu a ni tih hi i hre thar leh ang u.

2. Mihring dik tak ni tura buatsaih:
Piangthar hlim, kum 14 bawr vel te chu an taksa leh rilru a la puitling kim lo tih hria in nun kawng dik kawh hmuh an mamawh em em a ni. Ngaihsan tur dik te, rinawmna te, midangte nena chen ho dan te, an hma lam hun atana an inbuatsaihna tur kawng tha leh dik hrang hrang te zirtir a, kawh hmuh an ngai em em a ni. Tunlai khawvelah hian inelna a sangin ngaihhlut leh it tur tam tak a awm a. He khawvela dinhmun tha leh nihna te, in leh lo tha, sum leh pai tam zawk neih duhna a lian em em tawh a. Chumi karah chuan Pathian Thu – dik lo thei lo, hmasang ata tawh Pathiana rinna nghat tlat tute nun awhawm zia te, mi rinawm leh thudik tan tlat tute Pathianin mal a sawm dan te hi tunlai thangthar, Intermediate zirlaite hnenah hian tuh nghet tura nasa taka tan lak pawimawh zia hi kan zavaia kan hriat thar leh hi a pawimawh tak zetin ka hria. Hemi kawngah hian Kohhran mite hian khawvel than chak dan mila hma kan lak chak tawk loh avang nge kan ngaih pawimawh ber hi Pathian duh dan aiin dam chhung khawsakna daih tawk mil lekin kan lo inher rem ta nge, chhuan thar zingah hian Pathian tihna tak tak leh Pathian duh dan aia mahni remchan dan ang tawka inher rem duhna hi a tam ta a ni thei ang em? Kum thara Pathian thu kan zir dan leh kan zirtir dan pawh “Pathian ngaiha tha leh lawm tlak” ni thei tura tan kan lak theuh a va pawimawh tehlul em!

3. Kohhran mi dik tak ni tura buatsaih:
Kohhrana rinawm tura inzirtirna hi a pawimawh khawp mai a. Tan pawh kan la in Kohhran atanga chhuak ang chi pawh hi kan tam lem lo niin a lang. Nikum inchhiarna ka hmuh loh avangin nikum hmasa 2019 Report-ah chuan Mizoram Baptist Kohhran bikah hian member zat atanga chhutin 0.437% chauh hi Kohhran danga pakai kan awm a. Kan bial chhungah phei chuan nikum 2020 chhung khan Kohhran danga pakai pakhat mah kan awm lo tih Bialtu Pastor report-ah tarlan a ni. A lawmawm khawp mai. Hetih lai hian Kohhran ringawta rinawm hi a tawk lo va, Pathiana kan rinawm tlat hi a bul thut leh pawimawh hmasa ber tih hi tun aia nasa lehzuala kan inzirtir a tul hle in ka hria. Pathiana rinawm si lo va Kohhran ringawta mahni phak tawka lo rinawm ve ringawt hian Pathian hnen min thlen dawn lo va, Pathiana kan rinawm avangin kohhranah kan rinawmna kan tilang tur a ni, tih hi kan in hrilh hriat nawn fo a pawimawh hle a ni.

4. Pathian thu dik taka pawm leh hman tir:
Hei hi chuan Senior B Pawl-a awm te – zirtute leh zirtirtute min huam deuh berin a lang a. A pawimawh lai ber leh hmasawn kan ngaihna ber pawh a ni hial awm e. Kan kum zatin a tinzawn tawh avanga Senior B zirtu ni mek kan ni furin a rinawm a. ‘Puitling’ tia chhiar vek tawh, mahni duhthlannaa Sunday School kaite hian Pathian Thu dik takin kan pawmin kan hmang em? Kan zirnaah hian enge hlawkna leh zir tur thar kan hmuh thin? tih hi kan inteh fo na tur a ni dawn lawm ni? Senior B ah hian Bible ami eng bu emaw kan zir tlangpui a. Nikumah ‘Thufingte’ bu kan zir a, kan zir atang khan Pathian Thu-in “Finna” a tih chu enge a nih tal kan paw chhuak em? Bible Thu emaw, kan zirlaibu atangin emaw thu kam hnih/khat tal kan thinlungah Pathianin a tih nun a, kan ngaihtuah chhunzawm engzatnge awm? Hei tak hi Sunday School-a Pathian Thu kan zir chhan chu a ni dawn lawm ni? Kai tha lawmman dawn te, Exam lawmman dawn te, Chhungkuaa hming ziak nih te ni lovin keimahni ngeiin athara Bible chang emaw, kan zirlai bu atang emaw, sawihona atangin emaw - kan vei zui tur, tawngkam nung kan “homework” tur hi Sunday School atang hian vawi engzatnge kan hawn pui tawh, tih hi Sunday School kan hlawkpuina tur leh Pathian Thu zir pawimawhna ber – “Pathian Thu dik taka pawm leh hman tir” tih a hlawhtlinna tur chu a ni dawn lawm ni?

Nikum 2020 khan Sunday School kha vawi 9 kan kai hman a. Senior B-ah chuan zirlai 6, Pawl Siamrem Ni, Zirtirtute Orientation, Ennawn kan zir hman a, mitthi vawi khat kan neih avanga Sunday School kan kai theih loh hnu-ah Covid-19 avangin kum tluanin Sunday School kan kai thei ta lo kha a ni a. Kuminah chuan Pathian khawngaihna azarah engtik hunah emaw chuan Sunday School hi kan kai leh thei turin beisei ila. Chutiang hun a lo thleng anih chuan thinlung leh tihtak zetin Pathian thu hi zir ila. Mahni tana hlawkna thar chhar ngei turin tawngtaina nen Sunday School hi kai theuh turin ka insawm duh a ni.

Kuminah hian Senior B chuan Korinth lehkhathawn pakhatna kan zir dawn a ni a. Sunday School hi kan la kai thei rih lo anih pawhin zirlaibu hi neih ngei tum ila, mahni inah chawlhkar khat chhungin darkar chanve chauh tal Pathian thu dik taka pawm leh hmang thei turin i zir thin ang u hmiang? Kan zirlaia pawimawh tur - a chheh vel thute leh thuhmahruai kan zirna atang te, a bu chhung thu leh a awmzia Bible atang leh kan zirlai bu kan zir atang te in Pathian Thu chu thu nung, thil ti thei, mihring nun thlak danglam thei, van ram min thlen tir tura kawng min kawh hmuh thei a ni, tih kan hmuh chhuah ngei theihna turin tih tak zeta tawngtaina nen private-in Pathian thu hi i zir theuh ang u. Chu chu Sunday School thiltum a ni e.
Lalpa’n kan za atan malsawm rawh se.

Hla No 562 : “ Lalpa, I thu hi a hlu ber “ Lalpa Tawngtaina.

KHB NO :

Lalpa i thu hi a hlu ber,
Khawvel sum zawng zawng aiin,
Lalpa, i thu hi a mawi ber,
Khawvel ropuina aiin,
Khuai aiin a thlum si,
Ka thinlung a tilawm thin.

Thlaler ram ro kal tlang turin,
I thu hian min hruai zel ang;
Hei hi chhumding eng chu a ni,
Israel faten an zui kha;
Keini m in hruai turin
A eng a la chuai chuang lo.

Khawvel tuifinriat zauvah hian,
Hlauthawnga ka len laiin;
Hmar arsi angin i thu hian,
Kan van kawng min hriattir se;
Tin, kan zui hlen ang che,
Chatuana bo tawh lovin.

Thlemna tuifawn, thlemna ral lian,
Khawvel nen min do mah se;
Lalpa, min thuam la, i thu hian,
Thlarau ngunhnam a ni si;
Kan hlau lo'ng, Setana,
Nangma chakna hmachhuanin.

Lalpa Tawngtaina