THUCHAH:

A THIHNAA THI VE TURIN

Kumina Good Friday zing inkhawm sermon thupui atan hian hmunpui lam atanga thupui thlan sa a awm a, chu chu “ A thihnaa thi ve turin ” (Johana 11:16) tih a ni a. Kan aiawha Lal Isua thihna awmzia leh ataka kan tawmpui pawimawh zia tawite in tarlan kan tum dawn a ni. Lal Isua an khenbeh hun kha chhuitu tam ber chuan AD 30, April ni 7 niin an ring a. A kum leh hun hriat aia pawimawh zawk chu “Engvangin nge Isua Krista kha khenbeh a nih?” tih hi a ni a. A chhan dik tak chu “Pathian chatuan remruat anih avangin Lal Isua kha khenbehin a awm” tih hi a ni. Pathianin Adama leh Evi saruak thup nan ‘savun kawrfual’ a siam sak khan, thisen chhuak chauh vin sual ngaihdamna a awm thei tih a entir niin Bible zirmite chuan an sawi a. Nunna hlanna tur hmun chu Abrahama’n a fapa Isaaka a hlanna “Moria tlang” (Jerusalem), (2 Chron 3:1) niin a hunah pawh Kalhlen Kut lai niin Thuthlung Hlui lamah tarlan a ni. Chipchiar taka Kalhlen Kut hman dan tur Pathianin Mosia leh Arona hnena a sawi (Exodus bung 12) kha Lal Isua thihna tur entirna anga chhut theih a ni. Juda ho itsikna te, Rom sipai te leh Pilata te kha Pathian remruat hlawhtlinna tura hmanrua mai an niin ‘...leilung pian tirha talh tawh Beram No’ (Thupuan 13:8)-a Pathian lo ruat lawk tawh chu Isua Krista thihnaah hian a lo lang chhuak zawk a ni. Pathian engkim chunga thuneitu duhdanin engkim hi a thleng mek a, a thleng zel dawn bawk a, a tha lama Pathian thu thlen dik tirtu nge kan nih dawn a, a chhe lama thlen dik tirtu, mahni theuh hi i inenfiah thin ang u.

Kan thupui lak chhuahna Bible chang chu Johana 11:16 a ni a, Marthii te chhiat tawh lai, an nuta Lazara thih chungchanga Thoma thusawi a ni. Hemi hma lawk hian Bethani khuaah Isua chu lunga denhlum an tum lo tum tawh a (Johana 11:8), chuti chunga Bethani pana Isua kal a tum tlat kha Thoma hian, “A thihnaa thi ve turin i kal ang u” a ti a ni. Kan hmabak hi a eng lo hle a kan hriat chuan kan mang a ang a, hmabak hi kan huphurh fo thin a ni. Isua Krista he khawvela a lo kal lai khan, Pathian nihna famkim leh mihring nihna famkim nen a lo kal a ni, tiin Bible zir mite chuan an sawi thin a. A hmabak - kraws-a khenbeh kha a chak hauh lo a ni tih Gethsemani huana a tawngtainaah kan hmu a ni. Theih ni se pumpelh a duh a; nimahsela Pathian thu anih avangin huai takin a hma chhawn tih kan hre bawk (Luka 22:42). Engkima Pathian kuta innghah ngam tak takna atang lo chuan, “A thihnaa thi ve turin i kal ang u” tih hi thil huphurhawm ber zing ami a ni ngei ang. Amaherawhchu Pathian malsawmna tak tak chang tur chuan a man kan pek a, kan tuar a ngai a, huphurhawm eng ang mahse ‘nangma thu thu ni zawk rawh se’ ti thei apiangte hi Pathianin malsawmnaa a vur te an ni fo thin. A man pe lo chuan eng malsawmna mah hi dawn a harsa khawp mai.

THI tih hian nunna nei tawh lo chauh a huam lo va, inthenna – a keng tel. Kan taksa atanga kan thlarau a chhuah hian – thi, nunna nei tawh lo kan ni a. Chutiang chiah chuan kan sualte tlanna tura Lal Isua kha kraws-a a thih chiah khan Pathian nen nen an inthen a ni. Thianghlim famkim Pathian chuan sual nen an awmdun theih hauh loh avangin, Ama fapa ngei pawh mihringte sual phura kraws-a a tuar lai khan lehlam a hawisan lo thei lo a ni. Chuvangin, Isua kha “Ka Pathian, ka Pathian, engahnge mi kalsan?” tiin a au anih kha.

Thiam kan chan theihna kawng awmchhun anih avangin Isua Krista chuan kraws-ah a nunna a hlan a ni. Chatuan nunna chang tur chuan Lal Isua thihna hi kan hriat a, sual kawnga nung tawh lo va kan thih san a ngai a ni. (Rom 6:2).

‘Isua Krista thihnaa thi ve’ tih chu enge a awmzia ni ang le? Isua thihnaa thi, Krista hnena khenbeh, tih te hi thil thuhmun, tawngkam danga sawina a ni. Rom 6:1-11 kan en chuan chiang takin kan hmu. ‘Tu pawh thi tawh chu sual lakah a chhuak tawh si a’ (Rom 6:5). Sual laka thi, kan mihring hlui chu Isua Krista hnena khenbeh kan nih loh chuan Pathian nen kan leng dun thei dawn lo va. Tirhkoh Paula’n ‘Nitin ka thi thin’ (1 Kor 15:31) a tih te, Lal Isua’n ‘... mahni hrehawm pawisa lovin (mahni inphatin)..’ (Luka 9:23) awmze inang an ni. Sual laka thi, Krista hnena khenbeh, Isua thihnaa thi ve, han tih hian mihring thihna anga reh fihlim hlen nghal tura beisei chu mihring kan nih chhung chuan thil awm thei lo a ni. Isua Krista erawh chu Pathian famkim anih avangin vawikhat a thih avang khan kumkhuain a nung tawh a, a thi leh thei dawn lo, tih kan hmu (Rom 6:9). Pathian anpuia siam mihringte chu bawhchhiatna avangin suala piang kan ni a. Kan pianpui sual zawng zawng hi famkimna hmun kan thlen hma loh chuan a thi hlen thei tak tak lo. Chuti ni se, engtinnge sual chu kan thihsan ang le? Sual thihsan tur chuan Isua thihnaa thi ve in kan duhthlanna hmangin nitin sual kan kalsan a ngai. Sual, Pathian nen awmdun thei lo thihsan tur chuan THI TAWHAH INRUAT A NGAI. (chang 11). Nupui nei tawh chuan a tlangvalna a thihsan a, a nupui tan rinawm takin a awm mai a ni. A nupui aia tha leh fel pawhin beisei mah sela, thi tawha a inruat miau chuan a tibuai tawh lo vang. Pathianin kan pianpui sual ngaihdamna atan A fapa kraws-a thi tura a rawn tirhna hian kan nitin sual chi hrang hrang – chapona, duhamna, mahni hmasialna, chakna sual leh sual dang chi hrang hrang te hi thihsan turin nitin thapui thawha bei a ngai a ni. Kan ramah hian sual kan thihsan theih loh avanga kan buai nasat zia kan hre vek a. Keimahni duhthlanna ngeiin Lal Isua thihnaa thi nawn ve tur leh thi-a inruat thin turin Pathian Thu-in min hrilh a ni. Isua Krista anga vawikhat thih a tlei tlak theih a ni lo, nitin atharin kan duhthlanna ngeia thi nawn fo tur kan ni zawk. Hei hi mihring chaknaa tih rual anih loh avangin Pathianin min tanpuitu atan Thlarau Thianghlim min pe a, Thlarau Thianghlim hi thawhpui atan nitin atharin sawm thin ila, chu chu ringtu tinte nundan tur, Kristian nun dik tak a ni e.

Lalpa’n kan za atan malsawm rawh se.

Tawpna Hla : Khb 202 Kraws-ah chuan thisen hlu a awm

Kraws-ah chuan thisen hlu a awm

1. Kraws-ah chuan thisen hlu a awm,
Kraws thianghlim chu ka hmu;
Thisen chu Isuan min hriattir,
Ka tan hmana luang kha.

Aw, thisen ropui ber chu,
Isuan a tuarna chu;
Kraws chungah thisen hlu a luang,
Rinnain ka lo hmu.

2. Kraws chu, aw, kraws rit tak
Isuan ka tan a pu; [mai chu,
Lungngai taka a tuarna kha,
Kalvari-an a nghat.

3. A zang em kraws hlu tak mai
Kraws chu ka han thlir a;
Ka phur kang ve thei dawn emaw,
Ka bei ang kraun awm chu.

4. Lallukhum ropui ber mai chu,
Hnehtu lallukhum chu,
Vanah Isua ka hmuh hunin,
Kei pawh ka khum ve ang.

5. Ka mittui a tla tawh lo vang,
Hmangaih reh lohnaah;
Khawv>l ata min hruai chhuak la,
Lawmna hmun min thlen la.