Serkawn.org

Serkawn Kohhran chuan Tunkar Inrinni – November 7, 2009 khian nilengin ruai thehin Pathian chawimawina neih an tum.

September Beirual zawh atangin Camp chhawng hnih neih a ni a. Camp chhuah atang hian Kohhran inkhawm leh zaikhawm a nuam thei hle a. Mi tam takin Pathianah harh tharna changin taksa chetna nen Pathian an fak a ni. Tunah hian zantin zaikhawm programme a la awm chho zel a, harhna hi a la vung chho mek niin a lang. He harhna hian thalai lam a khawih nasa zual a, nu leh pa leh Kohhran hruaitu, Upa leh rawngbawltute pawh a kangkai chho mek bawk.

Tuna harhna kal mekin a ken hla tlanglawn zual te chu – “Thisen hlu thisen hlu, Thing Kross chung luang kha”, “Thumak ka sawi nin theih loh chu, Kalvari chanchin a ni”, “A hmangaihna-a ka chawlhin”, “Ka thlarau tho la hlim takin”, “Nangma thil ropuite an sawi”, “Aw hmangaihna, khawvel entu”, etc. tih te a ni. Lal Isua hmangaihna leh a tawrhna lam an tuipui hle.